काठमाडौं, माघ १२ गते
म्याराथनमा पहिलो पटक सहभागि बनेकी धाविका सन्तोषी श्रेष्ठले ढाकाको चर्चित म्याराथन भएको बंगबन्धु सेख मुजिब ढाका म्याराथनमा स्वर्ण पदक जितेकी छिन् ।
निर्धारित दुरी २ घण्टा ४६ मिनेट २२ सेकेण्डमा पूरा गरेपछि उनले राष्ट्रिय कीर्तिमान पनि रचिन्।यसअघि नेपालकै पुष्पा भण्डारीको नाममा रहेको २ घण्टा ४८ मिनेट ०२ सेकेण्ड दुरीको कीर्तिमान थियो।
गतवर्ष स्वर्ण जितेकी पुष्पा भण्डारीले भने प्रतियोगितामा रजत पदक जितिन्। उनको समय २ घण्टा ४९ मिनेट ३४ सेकेण्ड थियो। विन्द्राधन्के श्रेष्ठ भने पाँचौं स्थानमा रहिन् ।
सन्तोषी २०१९ मा काठमाडौंमा भएको १३ औं दक्षिण एसियाली खेलकुद (साग) को एथलेटिक्सको १० हजार मिटर दौडकी स्वर्ण विजेता खेलाडी हुन्। १० हजार मिटर सहित उनी हाफ म्याराथन र म्याराथनमा खेल्न थालेकी हुन्।
पुरुषतर्फको स्पर्धामा खडगबहादुर खड्का तेस्रो भएका छन् । उनले २ घण्टा १८ मिनेट ३२ सेकेण्डको समयमा रेस पूरा गरे। नेपालबाट ३ पुरुष र ४ महिला गरी ७ खेलाडीले भाग लिएका थिए।
प्रकाशित मिति: January 26, 2024
